(2008-02-07)
【東方日報專訊】話說Toby鍾意食又鍾意煮，眾多食物之中，對「牛」最為情有獨鍾，仲自認「牛魔王」。和牛西冷、肉眼平日就食得多，Toby今次去到天后一間法日餐廳，品嘗過鎮店的和牛三寶，先知原來和牛仲有其他好食部位，簡直係大開眼界。和牛三寶 嫩滑惹味餐廳à la umai走Fusion路線，將法日滋味共冶一爐，更以刁鑽食材作招徠。名菜和牛三寶就用上和牛面、和牛月展及和牛尾，可謂新鮮感十足，再以多種黑椒及香草炮製的山賊汁炆煮，真係零舍好食，難怪Toby大讚話：「無諗過和牛其他部位一樣軟滑無比，入口即溶，加埋辣辣的山賊汁，果然好夾。」 除了和牛三寶，餐廳亦引入日本及外國食材，其他推介尚有宮崎純然雞髀扒。「純然」即是走地雞，此雞髀扒味濃，肉質特別嫩滑，Toby表示：「煎香的雞髀扒外脆內嫩，肉汁豐富，真係無介紹錯。」 撰文：楊淑英 攝影：譚建章
和牛三寶 $268將和牛面、和牛月展及和牛尾先煎香，再用山賊汁炆煮，雙重烹調之後，香濃嫩滑，更入口即溶，各「牛魔王」必食之選。
宮崎純然雞髀扒 $168香煎這種「走地雞」扒，造到外脆內嫩的效果，加埋山賊汁炮製，辣辣好惹味，大廚更教路八成熟最好食。
魚安魚康魚肝 $138典型Fusion菜，肥美的魚肝以清酒略浸再烹調，帶股馥郁香氣，入口甘香軟綿，蘸上Wasabi沙律油同食，很有西菜風味。
沒有留言:
張貼留言